2019年，2020年對大家都係非常沈重嘅時光，所有人嘅計劃都被打亂，所有生活嘅步伐都被迫改變。不過無野係會難到我哋呢班長期唔夠瞓嘅香港人。黃子華話齋「香港嘅精神，就係『冇精神』。但係大家知唔知係玄學上無精神係好弊架？而每年犯太歲嘅生肖就等同於長期冇精神一樣，所以犯太歲嘅朋友記得要化解化解。
2021年牛年犯太歲嘅五大生肖分別係，屬牛、屬狗、屬羊、屬龍、屬馬。雖然話五個生肖都係犯太歲，但係佢哋犯太歲嘅情況係有分別架，主要分為刑太歲、破太歲、害太歲、沖太歲、值太歲。所以每一個生肖都有自己化解當年厄運嘅方法。
2021年十二生肖的「六合」及「三合」自救懶人包
生肖屬牛 – 犯太歲 (1937, 1949, 1961, 1973, 1985, 1997, 2009)
屬牛嘅朋友同太歲相同，稱之為值太歲，亦都係成日聽到啲師傅口中所講嘅「本命年」。生肖屬牛喺2021年係本命太歲，本命太歲代表住全年嘅整體運程都會有阻滯、計畫中嘅事情無辦法順利進行，無緣無故都有啲問題，做咩都事倍功半，同時係喺十二生肖當中情緒起伏最大，容易變得焦躁易怒，時時心緒不寧間接影響健康。 生肖屬牛今年事業適宜留喺原地發展，如果急住大展拳腳反而會諸多阻力，容易做出錯誤判斷，最後結果不堪設想，同時財運受阻。
化解方法：生肖屬牛要絕對嘅謹慎看待，犯太歲嘅影響在於心情起伏大，容易情緒低落或者好發脾氣，咩事都會自尋煩惱、時時半悲半喜，同時考驗住智慧同定性；最好以不變應萬變，謹慎保守，凡事以和為貴絕對係最強嘅護身符。同今年太歲迎合，貼身佩戴蛇形飾物化解。 可考慮去捐血、洗牙，同埋唔好去高危活動。
生肖屬狗 – 刑太歲 (1934, 1946, 1958, 1970, 1982, 1994, 2006, 2018)
屬狗嘅朋友偏沖太歲，稱之為刑剋太歲，對運程影響雖然唔及值太歲或者沖太歲咁明顯，但係吉凶50/50嘅一年，就算有好運庇護，但仍然唔可得意忘形，喺呢個時候更加要謙卑以待，先可以化危為機。2021年會有小人，同同事、同上司嘅關系都比較疏離，容易同同事為咗啲小事發生口角、意見不合，或者被人陷害造謠，簡稱是非多，係喺十二生肖當中最多是非。生肖屬狗要留意會唔會惹官司、罰款、或者自己專業失誤，要留意個人同屋企人嘅健康問題。今年容易因為性情暴燥動手，傷害自己嘅同時，仲為自己帶來一系列破財影響。生肖屬狗喺感情方面影響略大，未婚/戀愛中容易遇人不淑，小心口甜舌滑嘅人，而已婚屬狗朋友或會面臨第三者。
化解方法：生肖屬狗同太歲地支相刑，相刑最明顯嘅情況係出現喺言語紛擾上，要極為注意言語上嘅災禍，可能因為你一句話而傷到最親密嘅人。今年喺事業同財運上會受到是非干擾，無論係喺職場定係生活中，都會出現流言蜚語，絕對絕對要小心禍從口出，可能因為講錯野而惹上官非。所以對任何人都以友善嘅態度絕對係最強嘅護身符。同今年太歲迎合，貼身佩戴虎形飾物化解。可考慮去沖喜、結婚、添丁、置業、捐血、洗牙。
生肖屬羊 – 沖太歲 (1931, 1943, 1955, 1967, 1979, 1991, 2003, 2015)
屬羊嘅朋友係犯太歲中嘅沖太歲，「沖」嘅意思即係指沖擊、沖犯、變動，所以屬羊嘅朋友喺2021年嘅運勢反覆，比較多變動，低調行事會有幫助。生肖屬羊易有奔波勞碌，但卻徒勞無功嘅情形。容易有意外、流血、傷亡或者破財，如果處理不當，財運、事業、感情、家宅會受到較大嘅影響。生肖屬羊2021年最好凡事三思，步步為營。屬羊嘅朋友唔好灰心，雖然係喺十二生肖當中最多變動，但所謂多變動，當中亦有好變動，只係未必今年睇到。
化解方法：生肖屬羊如果有生意合作嘅賺錢計劃可免則免，如果一定要進行，請深思熟慮，同時冷靜分析。容易受到病符影響，抵抗力下降，要好好照顧身體，多做運動養好強壯嘅體魄絕對係最強嘅護身符。謹記謹記謹記平安就是福！同今年太歲迎合，貼身佩戴兔形飾物化解。可考慮去捐血、洗牙化解。
生肖屬龍 – 破太歲 (1928, 1940, 1952, 1964, 1976, 1988, 2000, 2012)
屬龍嘅朋友係犯太歲中嘅破太歲，喺犯太歲之中影響力最小。話雖如此，破太歲不利人際交往，所以喺今年最容易出現人緣問題，感情方面都容易出現磨擦，容易因為人事恩怨事情而煩惱費神。生肖屬龍全年都必須防是非破財，切勿多管閒事，避免無謂災害而引起官方訴訟。屬龍嘅朋友喺十二生肖當中說話最率直，平日率直係無咩唔妥，但喺犯破太歲時影響會特別明顯，容易受到沖擊，削弱運氣，嚴重的話導致生病問題。 另外生肖屬龍2021年事業有變動或者停薪留職，金錢又容易有所損失，感情上因小事而磨擦，精神壓力比其他十二生肖特別大，學識釋放/處理負面情緒絕對係最強嘅護身符。
化解方法：生肖屬龍原本計畫好嘅事情，會有狀況出現，無論事業定感情，甚至財運方面，都唔可以輕視破太歲帶黎嘅影響。特別投資理財方面，今年唔好做大額投資，好有可能會有血本無歸嘅破財情況。如果同人合作生財都一定要緊慎選擇夥伴。容易同合夥人引發人事紛爭，嚴重者甚至有官司糾紛，最終不歡而散。 戀愛情感上要多忍讓，事業上除咗要自我提升之外，親力親為都非常重要。同今年太歲迎合，貼身佩戴鼠形飾物化解。可考慮去沖喜、結婚、添丁、創業、置業化解。
生肖屬馬 – 害太歲 (1930, 1942, 1954, 1966, 1978, 1990, 2002, 2014)
屬馬嘅朋友係犯太歲中嘅害太歲，「害」嘅意思即係指陷害、損害、侵害。害太歲主家宅不寧，例如經常為家事擔憂，做野遇到阻滯，常常處於互相爭鬥對峙局面，容易被陷害、侵權、被朋友出賣、容易合作關係受損、或因為被人誤導而破財等。生肖屬馬值得一提嘅係喺十二生肖當中要特別防小人是非，以謙虛沉實對應，投資經營亦唔可以太貪心。生肖屬馬多病痛，特別係腸胃病，或食物中毒。感情出現問題，會有貌合神離嘅跡象。